أمينة خليل تكشف في لقاء جديد عائلتي ظهري الحقيقي

حلّت الفنانة ضيفةً على برنامج The W الذي تقدّمه الإعلامية دينا غبور على يوتيوب، حيث تحدثت عن زوجها المصوّر ، وعبّرت عن امتنانها الكبير لدعم عائلتها لها على مدار السنوات الماضية، وكشفت أنه لم يكن هناك أي نوع من الإلحاح بخصوص زواجها، بجانب حديثها عن شغفها الكبير للفن منذ الصغر.

وقالت أمينة: أهلي مكنوش بيزنّوا عليَّ علشان أتجوّز، وفعلاً أنا محظوظة إن أهلي مختلفين، وده اللي ساعدني أبقى البني آدمة اللي أنا عليها دلوقتي.

وعن مفهوم الحب بالنسبة إليها، قالت: مفهوم الحب اتغيّر عندي وبقى أعمق، وكنت فاكرة إني عايزة حد شبهي وشبه تفكيري، وبعدين اكتشفت أن شريك حياتك ممكن يبقى عكسك، أنا شخصية عفوية ولكن مش همجية، وقابلت الشخص اللي حاسة إنه شبهي والعلاقة ممشيتش خالص، فقلت إني عايزة حد أساسياته شبهي بس شخصيته مختلفة، وأحمد جوزي راكز وقليل الكلام وتقيل، وأنا وصلت لمعادلة لما أدخل في قصة حب مدّيش قلبي كله.

وتابعت: أنا بحب الحب، ومش لازم يكون حب لراجل، ممكن يكون لعيالك وأهلك وشغلك، وعمري ما حسيت بجنون العظمة، وأنا ضد مبدأ إن الفنان يتحطّ في قالب معين ويتعامل بطريقة معينة، وبتعمّد إني أقول رأيي، والناس بتستسهل إنها تحكم على بعض، وده شيء بيعصبني جداً، ليه بنحكم على بعض؟.