هدرة من القلب أنا ومشاغلي ومستقبل بلدي كتب حاتم الشعبي

أنا واحد ابن حافة زيي زي أي واحد منكم أصحى الصبح أشرب شاي ملبن وآكل كم قرص خمير وأتابع الأخبار وأطلع أدور رزقي بين التعب والأمل لا أنا صاحب قرار ولا صوتي يوصل فوق ولا بيدي عصا سحرية أغير بها حالنا لكن عندي قلب متعلق بهذي البلاد وعقل يقول لي إننا لو ما وقفنا جنب بعض بنظل ندور في نفس المكان وربما حلقة مفرغه

فتمر علينا أيام والله يضيق فيها الصدر من كل شيء من الحال اللي وصلنا له ومن الأخبار السيئة التي نسمعها ومن الوضع الصعب اللي عايشينه لكن لما أهدأ وأفكر أرجع أقول لنفسي طيب إلى متى..؟ لو كل واحد فينا ينتظر غيره يبدأ من بيبدأ..؟ ولو كلنا قلنا “أنا مالي دخل” من بيكون له دخل..؟

مش لازم نتشابه عشان نتفق وطبيعي نختلف وكل واحد له رأيه وطريقته بالفهم والتعبير لكن في أشياء ما ينفع نختلف عليها وأهمها إن الوطن أكبر من كل خلافاتنا وإن مستقبل عيالنا يستاهل منا نكون أقرب لبعضنا البعض مش أبعد

أنا كمواطن بسيط ما أفهم في السياسة الكبيرة لكني أفهم في الاستقرار وأشوف إن فخامة رئيس الجمهورية الدكتور رشاد العليمي اليوم شايل مسؤولية ثقيلة في وقت صعب ومعه مجلس القيادة الرئاسي يحاولوا يمسكوا البلد من الانزلاق أكثر مما هي عليه اليوم يمكن في أخطاء ويمكن الطريق طويل لكن برضه البلد ما تتحمل ندخل في دوامة جديدة ونفس الكلام ينطبق على الحكومة بقيادة الدكتور شائع الزنداني اللي قدامها تحديات أكبر من أي كلام إحنا كمواطنين نشوف النتائج ببطء لكن نعرف كمان إن الوضع مش سهل وإن أي خطوة للأمام لو صغيرة تفرق

وكلمة حق لازم نقولها بأعلى صوتنا أشقاؤنا في المملكة العربية السعودية وقفوا مع اليمن وقفة ما تتنسي بقيادة خادم الحرمين الشريفين سلمان بن عبدالعزيز آل سعود وبمتابعة من ولي العهد الأمير محمد بن سلمان فالدعم ما كان مجرد كلام بل شفناه في أشياء خففت علينا جزء من المعاناة وهذا موقف يستحق التقدير